Փետրվարի 4-ը քաղցկեղի դեմ պայքարի համաշխարհային օրն է: Աշխարհում տարեկան 12մլն. մարդ հիվանդանում է քաղցկեղով, որոնցից 7մլն. մահանում է: Ուռուցքաբանության ազգային կենտրոնի փոխտնօրեն, բժշկական գիտությունների դոկտոր, պրոֆեսոր Գագիկ Բազիկյանը երեկ լրագրողների հետ հանդիպման ժամանակ ասաց, որ հիվանդների 40-45 տոկոսը բժշկին դիմում է ուշացած, մինչդեռ անչափ կարևոր է քաղցկեղի վաղ հայտնաբերումը: Գագիկ Բազիկյանը հավելեց, որ քաղցկեղն առաջին փուլում 90-98 տոկոս բուժման հաջողություն է ունենում: Երկրորդ փուլում այն նվազում է 50-55 տոկոս և 3-4 փուլերում հաջողության հավանականությունը նվազում եւ հասնում է 10-12 տոկոս: "Որքան վաղ է հայտնաբերվում քաղցկեղը, որքան մարդն ուշադիր է իր առողջության նկատմամբ, այնքան հաջողություններն ակնառու են",- ասաց պրոֆեսորը: Նա նաև նշեց, որ քաղցկեղը նենգ հիվանդություն է, որը չունի հատուկ ախտանիշներ և կարող է քողարկվել այլ հիվանդությունների ախտորոշումների տակ: Հաճախ մարդիկ ուշադրություն չդարձնելով հիվանդությանը` կարծելով, որ թոքաբորբ է կամ հաստ աղիների բորբոքում, չեն դիմում համապատասխան բժշկին:
2009թ. տվյալներով առաջին տեղում է թոքերի քաղցկեղը՝ 1276 դեպք, երկրորդ տեղում կրծքագեղձի քաղցկեղն է` 990 դեպք, երրորդ` ստամոքսի քաղցկեղը հիվանդացության 580 դեպքով: Տղամարդկանց քաղցկեղով հիվանդացությունը կազմում է 48 տոկոս, իսկ կանանցը` 52 տոկոս:
Գագիկ Բազիկյանը հարկ համարեց նշել, որ քաղցկեղը ոչ թե մահապատիժ է, այլ ախտորոշում: Քաղցկեղը բուժվում է հետևյալ մեթոդներով` վիրաբուժություն, ճառագայթային բուժում, քիմիոթերապիա, իմունոթերապիա և հորմոնոթերապիա:
Հիվանդության երիտասարդացումն առկա է, սակայն, ըստ Ուռուցքաբանության ազգային կենտրոնի փոխտնօրենի` այն ահռելի թիվ չի կազմում: Տվյալ դեպքում մեծ դեր ունի ժառանգականության գործոնը, սթրեսը, բազմաթիվ հորմոնալ դեղամիջոցների ընդունումը, անորակ սնունդը, մասնավորապես՝ արագ սնունդը:
Առողջ լինելու համար պրոֆեսոր Բազիկյանը խորհուրդ է տալիս լինել ուրախ, քանի որ ուրախությունն իմունային համակարգի կարևոր մասն է և երկարացնում է կյանքը, չծխել, չխմել, քիչ նյարդայնանալ և խուսափել սթրեսներից:
