Ֆրանսիացի կոմպոզիտոր Միշել Լեգրանը Կրասնոդարում իր շրջագայության ժամանակ Թուրքիայի հանդեպ հանդես է եկել սուր քննադատությամբ: Այդ մասին հաղորդում է Ռուսաստանում հայերի "Խաչքար" ամսագիրը:

Խոսելով Հայաստանի և Թուրքիայի միջև հարաբերությունները նորմալացնելու փորձերից, Միշել Լեգրանը հայտարարել է. "Այն, ինչ տեղի է ունեցել 1915 թվականին, անտանելի և անհնարին է, և այն, որ Թուրքիան չի ցանկանում ճանաչել ցեղասպանությունը, նշանակում է, որ նա երբեք չի մտնի Եվրոպական հասարականություն: Այժմ Հայաստանի և Թուրքիայի միջև հարաբերությունները բարելավվում են, և դա լավ է, բայց ավելի լավ կլինի, եթե Թուրքիան վերադարձնի Հայաստանին այն տարածքները, որոնք նա գողացել է: Չնայած ես քաջ գիտակցում եմ, որ դա հեշտ չէ":

Լեգրանը նաև հայտարարել է, որ թուրքական իշխանությունները հրաժարվել են իրեն թույլտվություն տալ այցելելու իր հայ նախնիների գյուղը, որը գտնվում է Թուրքիայի տարածքում:

"Թուրքական իշխանությունները հեգնանքով բացատրեցին, որ հիմա չի կարելի, հետո կարելի է, իսկ ներկա պահին` ոչ",-հայտարարել է Լեգրանը` նշելով, որ իր կարծիքով այս ամենի պատճառը իր հայկական արմատներն են:

Ավելի վաղ Թուրքիային ներկայացված՝ Ցեղասպանությունը ճանաչելու և հայկական հողերը վերադարձնելու հրապարակային պահանջով հանդես էր եկել մեծ շանսոնյե Շարլ Ազնավուրը:

Լ.Խ.